Elísabet Ronaldsdóttir er einn fremsti klippari landsins og hefur klippt margar stærstu íslensku bíómyndirnar síðari ár. 

Hún hefur undanfarna mánuði dvalið í Los Angeles þar sem hún klippti hasarmyndina John Wick með Keanu Reeves í aðalhlutverki. Leikstjórar myndarinnar þeir Chad Stahelski og David Leitch eru áhættuleikarar sem hafa gert slagsmálasenur fyrir myndir á borð við Fight Club, Matrix og 300. 

Elísabet segist hafa nálgast myndina eins og „alpha-male“ dansmynd, og að í raun sé lítill munur á því að klippa dans og slagsmál. Þó eftirköstin séu ólík.

„Ég er búin að horfa mikið á rómantískar gamanmyndir síðan ég kom heim. Ég held ég hafi fengið testósteróneitrun. Ég var mjög nálægt því að byrja að raka mig á morgnana,“ segir Elísabet í viðtali við Fókus sem má nálgast hér að ofan.