Van Gaal: Það eru tíu menn meiddir hjá okkur

Louis Van Gaal, knattspyrnustjóri Manchester United, er að sjálfsögðu mjög sáttur með komu Angel Di Maria til United en Hollendingurinn er ekki eins kátur með stöðuna á leikmannahópi sínum.

Angel Di Maria er einn af fjórum nýjum leikmönnum Manchester United sem félagið borgaði stórar upphæðir fyrir í sumar en hinir þrír eru ekkert að fara spila um helgina samkvæmt Louis Van Gaal.

„Það eru tíu menn meiddir hjá okkur eða einum meira en í síðustu viku," sagði Louis Van Gaal á blaðamannafundinum þar sem Angel Di Maria var kynntur til leiks.

Van Gaal staðfesti á fundinum að Ander Herrera sé enn meiddur alveg eins og Luke Shaw og þá er Argentínumaðurinn Marcos Rojo enn að bíða eftir atvinnuleyfi.

Manchester United mætir Burnley í ensku úrvalsdeildinni um næstu helgi og þar eiga stuðningsmenn Manchester United von á því að sjá Angel Di Maria klæðast sjöunni hjá United í fyrsta sinn.