56 flugferðir frá Keflavík daglega

Farþegamet var slegið á Keflavíkurflugvelli í júlí en alls voru farnar rúmlega sautján hundruð áætlunarferðir frá vellinum. Það gera liðlega 56 ferðir til útlanda á daga samkvæmt talningu Túrista.is

Flugfélögin Icelandair og WOW air stóðu fyrir nærri átta af hverjum tíu brottförum frá vellinum í síðasta mánuði.

Farþegarnir voru alls 546.749 talsins sem fóru um Flugstöð Leifs Eiríkssonar og aldrei áður hafa þeir verið jafn margir í einum mánuði. Aukningin er 17,8 prósent miðað við sama mánuð í fyrra segir í tilkynningu frá Isavia, rekstraraðila flugvallarins í Keflavík.

Að jafnaði voru farnar 56 ferðir á dag frá Keflavík  sem fyrr segir og er það aukning um nærri þriðjung frá því í júlí í fyrra.

Tuttugu flugfélög héldu uppi áætlunarflugi frá landinu en þau voru sextán í júli í fyrra. Vægi þeirra flestra er þó mjög lágt og hlutdeild Icelandair og WOW air hefur nær ekkert breyst frá sama tíma á síðasta ári. Icelandair stóð því áfram fyrir nærri tveimur af hverjum þremur brottförum og sjöunda hver ferð er á vegum WOW air. Leiguflug á vegum ferðaskrifstofa er ekki tekið með í talningu Túrista.

Vægi fimm stærstu flugfélaganna á Keflavíkurflugvelli í júlí 2014:

1. Icelandair: 64,6%
2. Wow Air: 13,8%
3. Easy Jet: 3,5%
4. Airberlin: 3,3%
5. SAS: 2,4%