Lýsing hefur leiðrétt fyrir 20 milljarða

Ellefu prófmál, sem áttu að skýra réttarstöðu þeirra sem hafa gengistryggð lán, voru valin í júní árið 2012, fyrir rúmum tveimur árum. Skipaður var samráðshópur vegna þessa en málin áttu að fá flýtimeðferð fyrir dómstólum. Samkvæmt upplýsingum frá umboðsmanni skuldara fóru hins vegar bara tvö þessara mála í gegnum dómskerfið en önnur voru felld niður.

Sigurvin Ólafsson, lögmaður hjá Bonafide lögmönnum, segir eitt af þessum prófmálum hafa verið gegn Lýsingu. Fyrirtækið hafi tapað málinu í héraðsdómi og því verið áfrýjað til Hæstaréttar.

„Lýsing dró þá áfrýjun svo til baka, þremur dögum áður en það átti að flytja málið fyrir Hæstarétti, þannig að það var bara ekkert klárað. Þar hefði málið kannski bara verið leyst,“ segir Sigurvin Ólafsson, lögfræðingur hjá Bonafide lögmönnum.

Hann segir pattstöðu ríkja varðandi endurútreikning gengislána.

„Fyrst um sinn, sagði ég bara fólki að bíða og sjá því það væru mál í kerfinu. Síðan hefur maður bara séð það, að það er alveg sama hvaða dómur fellur, svörin breytast ekkert hjá Lýsingu. En svona síðustu misserin hef ég ekkert annað séð í stöðunni fyrir fólk, annað en að leita réttar síns fyrir dómi,“ segir Sigurvin.

Því er ljóst að tæpum sex árum eftir hrun eru enn mörghundruð lánasamningar í lausu lofti. Sigurvin segir þó aðeins eitt fyrirtæki draga lappirnar varðandi endurútreikninga gengislána - en það er Lýsing.

„Nei. Lýsing dregur ekki lappirnar. Lýsing vill gjarnan leysa málin farsællega og eins fljótt og unnt er. Lýsing byggir á skýrum fordæmum úr Hæstarétti og skýrum lögum og reglum. Enda hvernig mætti annars skýra það að hér hafi verið leiðréttir samningar fyrir fjárhæð sem nemur um 20 milljarða króna,“ segir Þór Jónsson, upplýsingafulltrúi Lýsingar.

Þór segir að meta verði yfirlýsingar þeirra fyrirtækja sem sækja kröfur gegn fjármálafyrirtækjum, í því ljósi að hér er um viðskipti að ræða.

„Og þetta er auglýsingamennska að hálfu nokkurra fyrirtækja og yfirlýsingarnar bera öll merki auglýsingaskrums, því miður,“ segir Þór.