"Furðuleg túlkun, langsótt og röng“

„Umhverfisstofnun hefur ekki komið nálægt náttúruvernd við Kerið í 14 ár,“ segir Óskar Magnússon, stjórnarformaður Kerfélagsins. Umhverfisstofnun álítur gjaldtöku við Kerið ólögmæta. Óskar telur lagatúlkun stofnunarinnar furðulega, langsótta og beinlínis ranga.

Í Fréttablaðinu í gær var greint frá bréfi sem Umhverfisstofnun sendi umhverfis- og auðlindaráðherra á fimmtudag. Þar kemur meðal annars fram að að gjaldtaka við Kerið og önnur svæði á náttúruminjaskrá standist ekki lög. Umhverfisstofnun sé nú með það til skoðunar hvort beita eigi ákvæði í lögum sem heimilar Umhverfisstofnun að gera samning við landeigendur um að innheimta gjald.

Óskar Magnússon, stjórnarformaður Kerfélagsins, sem hóf gjaldtöku á síðasta ári, segir niðurstöðu Umhverfisstofnunar furðulega.

„Hvað varðar lögfræðina sem mér sýnist að sé verið að koma á framfæri þá er hún ekki einungis furðuleg heldur mjög langsótt og auðvitað röng,“ segir Óskar.

„Hvert er hlutverk Umhverfisstofnunar?“

Óskar segir það skyldu landeigenda að gæta þess að náttúra spillist ekki. Hann vísar í 13. og 14. gr. laga um náttúruvernd og segir þær lagagreinar eiga ótvírætt við um Kerið. Kristín Linda Árnadóttir, forstjóri Umhverfisstofnunar, segir í samtali við Fréttablaðið að sérstakar reglur gildi um náttúruverndarsvæði og það þurfi sérstaka lagaheimild til að innheimta aðgangseyri. Sú heimild sé ekki til staðar.

Óskar vísar þessu á bug og vísar í 32. gr. náttúruverndarlaga sem segir að heimilt sé að ákveða gjald fyrir aðgang að svæðinu ef spjöll hafa orðið af völdum ferðamanna eða hætta er á slíkum spjöllum.

„Umhverfisstofnun sem hefur það hlutverk að vernda íslenska náttúru, það er hennar meginhlutverk, hún hefur ekki komið nálægt því hlutverki við Kerið í 14 ár. Núna þegar við sem eigum Kerið hefjum gjaldtöku til þess eins að vernda náttúruna þá snýr stofnunin þessu öllu á haus. Um hvað snýst þessi stofnun? Snýst hún um sjálfa sig? Hvaða verkefni hefur hún ef hún sinnir ekki náttúrunni? Þegar menn fara að gera það með lítilsháttar gjaldtöku þá umhverfist þessi stofnun,“ segir Óskar.

„Það er alveg óskiljanlegt að sú stofnun sem á að vernda náttúruna skuli berjast gegn því að það sé gert.“