Leit hætt í Bleiksárgljúfri

Leitaraðgerðum í Bleiksárgljúfri hefur verið hætt og að svo stöddu er ekki fyrirhuguð frekari leit á svæðinu. Þetta staðfestir Svanur Sævar Lárusson, sem stýrir aðgerðum á svæðinu, í samtali við Vísi.

Björgunarsveitarmenn héldu í dag áfram leitinni að Ástu Stefánsdóttur, sem hvarf um Hvítasunnuhelgina. Var leitast við að stífla Bleiksá í þeirri von um að hægt væri að leita í fossinum þar.

Svanur segir að tekist hafi að dæla töluverði vatni fram fyrir fossinn, sem hafi gert kleift að síga niður í fossinn. Þar hafi komið í ljós vatnsgöng í berginu sem ekki sé óhætt að senda neinn inn í.

„Þetta eru bara aðstæður sem ráðum ekki við. Aðstæður þarna inn í þessu gili eru bara það erfiðar að við erum búin að gera meira en við getum í rauninni. Að svo stöddu er ekki fyrirhuguð nánari leit,“ segir Svanur.