Arsenal dregur sig úr baráttunni um Fabregas

Arsenal mun ekki nýta sér forkaupsrétt sinn á Cesc Fabregas samkvæmt vef BBC en þetta kom fram nú í kvöld. Talið er að Chelsea leiði kapphlaupið um spænska miðjumanninn.

Þegar Fabregas gekk til liðs við Barcelona frá Arsenal var sett klásúla í samning hans að Arsenal fengi forkaupsrétt á miðjumanninum en skytturnar ætla ekki að notfæra sér hann.

Samkvæmt BBC hefur Fabregas áhuga á að ganga til liðs við Arsenal á ný til þess að vinna með fyrrum læriföður sínum, Arsene Wenger en áhuginn er einhliða. Wenger telur meiri þörf að styrkja aðrar stöður á vellinum en liðið er vel stætt af skapandi miðjumönnum.

Þetta opnar dyrnar fyrir keppinauta Arsenal en Fabregas hefur verið orðaður við Chelsea, Manchester United, Manchester city og Liverpool undanfarnar vikur.