18 leikir á HM á Stöð 2 Sport 2 | Gummi Ben með HM-messu

Stöð 2 Sport 2 sýnir 18 leiki frá heimsmeistaramótinu í knattspyrnu sem hefst í Brasilíu í næsta mánuði í beinni útsendingu og þá verða allir leikdagarnir gerðir upp í sérstakri HM-messu með GuðmundiBenediktssyni.

365 miðlar og RÚV komust að samkomulagi um þetta í dag en það voru Magnús Geir Þórðarson, útvarpsstjóri, og Ari Edwald, forstjóri 365 Miðla, sem undirrituðu samstarfssamning stöðvanna í Efstaleiti í dag.

Stöð 2 Sport 2 sýnir alla leiki riðlakeppninnar í fyrstu tveimur umferðunum sem hefjast klukkan 22.00. Þar má benda á frábæra leiki á borð við viðureignir Englands og Ítalíu annarsvegar og Bandaríkjanna og Portúgals hinsvegar.

Í lokaumferðinni, þegar leikir riðlanna eru spilaðir á sama tíma, sýnir Stöð 2 Sport annan leikinn á móti RÚV en þar á meðal eru leikir Bandaríkjanna og Þýskalands og Kosta Ríka og Englands. Í heildina eru allir leikir Bandaríkjanna sýndir en með liðinu leikur Fjölnismaðurinn Aron Jóhannsson.

RÚV sýnir þá leiki sem hefjast klukkan 16.00 og 19.00 á hverju kvöldi en að þeim loknum tekur við HM-messan með Gumma Ben á Stöð 2 Sport 2. Þar verða fyrstu tveir leikir dagsins gerðir upp og hitað upp fyrir leikinn sem hefst klukkan 22.00, leikinn sem sýndur verður á Stöð 2 Sport 2.

RÚV sýnir alla leikina í útsláttarkeppninni en þeir verða svo endursýndir á Stöð 2 Sport 2 og látnir rúlla á stöðinni á milli leikja og HM-messunnar.

„Við erum mjög ánægðir með að hafa náð þessu samkomulagi við ríkissjónvarpið. Á milli okkar hefur ríkt gott samstarf. Við erum með sérstaklega ánægðir með þá leiki sem við fáum og teljum að fótboltaleikir klukkan 22.00 á kvöldi að sumri til sé skemmtileg tímasetning,“ segir HjörvarHafliðason, dagskrárstjóri Stöðvar 2 Sports, í samtali við Vísi.

„Það gleður mig mikið að við skulum sýna alla leiki Bandaríkjanna í riðlakeppninni með það í huga að Aron Jóhannsson leiki með liðinu. Það er hluti af stefnu Stöðvar 2 Sports að fylgjast með glæsilegum íslenskum fyrirmyndum. Það höfum við einnig gert með GunnariNelson í UFC og afrekskonunum AnítuHinriksdóttur og ÁsdísiHjálmsdóttur á Demantamótaröðinni sem við hófum nýlega sýningar á,“ segir Hjörvar.

Hjörvar er sjálfur annálaður sparkspekingur og fótboltaáhugamaður en hann hlakkar til að horfa á mótið í Brasilíu.

„Loksins er heimsmeistaramótið komið aftur til Brasilíu, sem er á vissan hátt faðir fótboltans ef England er móðurlandið,“ segir hann léttur í bragði.

Sem fyrr segir mun Guðmundur Benediktsson halda utan um HM-messuna á Stöð 2 Sport 2 í sumar.

„Það hefur verið stefna mín frá fyrsta degi að fá sérhæfða menn til starfsins. Eins og þeir sem þekkja til sportstöðva okkar hafa kynnts nálgumst við fótboltann með fólki sem þekkir íþróttina inn og út. En auðvitað verður smá léttmeti með í för eins og Gumma Ben er einum lagið. Fótboltinn verður samt alltaf í fyrsta sæti,“ segir Hjörvar Hafliðason.

Leikirnir á HM sem verða í beinni á Stöð 2 Sport 2:

13. júní, klukkan 22.00

B-riðill: Síle-Ástralía

14. júní, klukkan 22.00

D-riðill: England-Ítalía

15. júní, klukkan 22.00

F-riðill: Argentína-Bosnía

16. júní, klukkan 22.00

G-riðill: Gana - Bandaríkin

17. júní, klukkan 22.00

H-riðill: Rússland - Suður Kórea

18. júní, klukkan 22.00

A-riðill: Kamerún - Króatía

19. júní, klukkan 22.00

C-riðill: Japan - Grikkland

20. júní, klukkan 22.00

E-riðill: Hondúras - Ekvador

21. júní, klukkan 22.00

F-riðill: Nígería - Bosnía

22. júní, klukkan 22.00

G-riðill: Bandaríkin - Portúgal

23. júní, klukkan 16.00

B-riðill: Ástralía - Spánn

23. júní, klukkan, 20.00

A-riðill: Kamerún - Brasilíu

24. júní, klukkan 16.00

D-riðill: Kosta Ríka - England

24. júní, klukkan, 20.00

C-riðill: Japan - Kólumbía

25. júní, klukkan 16.00

F-riðill: Bosnía - Íran

25. júní, klukkan, 20.00

E-riðill: Ekvador - Frakkland

26. júní, klukkan 16.00

G-riðill: Bandaríkin - Þýskaland

26. júní, klukkan, 20.00

H-riðill: Suður Kórea - Belgía