"Reiðhjólin eru aftast í goggunarröðinni, þau eru fyrst út"

Frá og með 1. maí er óleyfilegt að fara með reiðhjól inn í strætisvagna Akureyrar. Á hurðum strætisvagnanna hefur verið komið upp skilaboðum til hugsanlegra notenda almenningssamgangna í bænum að flutningur reiðhjóla sé ekki leyfður með strætisvögnunum.

Helgi Már Pálsson bæjartæknifræðingur Akureyrar segir það hafa færst í vöxt að hjólandi vegfarendur hafa tekið sér far með strætisvögnum Akureyrar og að nú sé komið að ákveðnum þolmörkum. Reiðhjól taki of mikið pláss í vögnum bæjarins og því hafi verið gripið til þess ráðs að banna reiðhjól.

Þegar Helgi var spurður út í barnavagna eða aðra hluti sem taka mikið pláss í vögnunum sagði hann að það þyrfti að meta það í hvert skipti hvort pláss væri fyrir slíkt. „Barnavagnar eru áfram leyfðir í strætisvögnunum enda eru þeir nú kannski annars eðilis. Strætisvagnar Akureyrar eru fyrir gangandi vegfarendur, og hjólandi fólk eru ekki gangandi vegfarendur og það eru þeir sem njóta forgangs í vagnana okkar.“

Helgi Már vill ekki meina að það gerist oft að vagnarnir yfirfyllist. Hins vegar segir hann vandamálið færast í vöxt og því þurfi að grípa til einhverra úrræða.

„Ef lítið er í vögnunum þá er ekkert að því að taka hjólandi vegfarendur upp í vagnana. Vagnstjóri verður bara að vega það og meta í hvert sinn. Hins vegar ef vagninn fyllist svo verður hann að geta þurft að vísa hjólandi manni út úr vagninum. Reiðhjólin eru aftast í goggunarröðinni, þau eru fyrst út“ segir Helgi Már.

„Vagnstjóri verður allavega ekki rekinn fyrir að taka reiðhjól í vagnana í sumar", segir Helgi Már.