Farþegagjald á Reykjavíkurflugvelli 141 prósenti hærra en árið 2011

Hanna Birna Kristjánsdóttir, innanríkisráðherra, segir að lækka þurfi opinber gjöld á innanlandsflug, í hvaða formi sem er. Þetta kom fram í svari hennar við skriflegri fyrirspurnSilju Daggar Gunnarsdóttur, þingmanni Framsóknarflokks.

Hún segir að á vegum ráðuneytisins sé starfshópur að hefja störf sem muni kalla eftir upplýsingum um stöðu virðisaukaskattsgreiðslna flugfélaga á innanlandsmarkaði um opinber gjöld á flugvélaeldsneyti.  Niðurstöðu frá starfshópnum er að vænta í haust.

Hanna Birna vísar í bókun flugráðs frá 5.desember 2012 þar sem sagt er að sívaxandi hækkanir á opinberum gjöldum á innanlandsflugið sé komið yfir þolmörk og muni það óhjákvæmilega bitna á farþegum. Þá segir að varað sé við að sjálfbærni í flugrekstri innanlands sé ógnað og samkeppnisskilyrði verulega veikt með óhóflegri gjaldtöku.

„Efnahagshrun í landinu má ekki leiða til þess að rekstrarumhverfi innanlandsflugs verði varanlega skekkt sem getur síðar leitt til beinna opinberra útgjalda til þess að tryggja eðlilega þjónustu við búsetu fólksins í landinu,“ segir jafnframt í bókuninni.

Í skriflegri fyrirspurn frá Haraldi Benediktssyni, þingmanni Norðvesturkjördæmis, segir að frá því að farþegagjald var lagt á árið 2011 hafi það hækkað um 141 prósent á Reykjavíkurflugvelli en sé óbreytt á öðrum flugvöllum landsins. Þá hafi lendingargjöld hækkað um 320 prósent frá árinu 2009 en um 83 prósent á öðrum innanlandsflugvöllum.