„Algjörlega ósatt að Bandaríkjamenn séu mesta hvalveiðiþjóð heims“

„Það er algjörlega ósatt að Bandaríkjamenn séu mesta hvalveiðiþjóð heims,“ segir Paul Cunningham, upplýsinga- og menningarmálastjóri bandaríska sendiráðsins.

„Við höfum séð marga halda þessu fram; stjórnmálamenn og fólk í fjölmiðlum og á samskiptamiðlum. En það er ansi greinilegt að Bandaríkin eru ekki helsta hvalveiðiþjóð heims – hvernig sem á málið er litið,“ bætir Cunningaham við.

Hann bendir á tölur frá Alþjóðahvalveiðiráðinu.

Ekki efstir í frumbyggjaveiðum

Bandaríkin stunda eingöngu frumbyggjaveiðar, tegund hvalveiða sem stundaðar hafa verið á ákveðnum svæðum með svipuðum aðferðum til lengri tíma. Ef litið er á tölur yfir frumbyggjaveiðar allt frá árinu 1985, kemur í ljós að Bandaríkjamenn veiða ekki flesta hvali á heimsvísu, með aðferðum frumbyggja.

Frumbyggjar í Rússlandi og Grænlandi hafa veitt fleiri hvali en Bandaríkjamenn nánast öll árin, eins langt aftur og tölur Alþjóðahvalveiðiráðsins ná.

Frumbyggjaveiðar Bandaríkjanna eru stundaðar í norðurhluta Alaska, auk þess sem einn ættbálkur amerískra frumbyggja í Washington-fylki hefur leyfi til að stunda hvalveiðar. „Veiðarnar fara að langstærstu leiti fram í Alaska. Eins lengi og menn muna hafa frumbyggjaveiðar farið fram þar,“ útskýrir Cunningham.

Vilja kveða mýtuna í kútinn

„Við viljum bara kveða þessu mýtu í kútinn. Bandaríkin eru hvergi nærri toppnum þegar kemur að hvalveiðum,“ segir Paul ennfremur. 

Nákvæm skráning er haldin yfir hvalveiðar, hvort sem það eru tilraunir til þess að veiða hvali eða fjöldi hvala sem veiðimenn ná á land. 

Skráningar yfir vísindaveiðar og hvalveiðar í atvinnuskyni sýna að Norðmenn eru stórtækastir þegar kemur að hvalveiðum.

Minnisblað Obama

Cunningam segir einnig mikilvægt fyrir umræðuna að rétt sé farið með ástæður þess að Barack Obama Bandaríkjaforseti ákvað að senda bandaríska þinginu minnisblað um íslenskar hvalveiðar.

„Með því að skrifa þetta bréf var Obama ekki að segja að íslenska þjóðin væri slæm á neinn hátt. Bandaríkjamenn eru einfaldlega að benda á að útflutningur á hvalkjöti er á skjön við CITES-samkomulagið. Þetta bréf snýst ekki um hrefnuveiðar Íslendinga og það er eins og fólk geri sér ekki grein fyrir því.– heldur snýst þetta um alþjóðleg viðskipti með langreyðakjöt.“

CITES-samkomulagið segir í stuttu máli að ekki eigi að stunda viðskipti með dýr eða plöntur í útrýmingahættu.

Hvalaskoðun en ekki hvalveiðar

Cunningham segir Bandaríkjamenn vel gera sér grein fyrir því að lítill hluti þjóðarinnar stundi hvalveiðar til útflutnings. 

„Við leggjum áherslu á að eitt fyrirtæki hafi verið að stunda viðskipti með hvalkjöt og við skiljum að þetta snýst um mjög lítinn hluta íslensku þjóðarinnar. Við viljum því hafa áhrif á jákvæðan hátt. Við viljum því ekki setja á harkalegar viðskiptaþvinganir. Við viljum fylgjast með fyrirtækjum sem eru að stunda útflutning á hvalkjöti og eru því að fara á skjön við CITES-samkomulagið.“

Bandaríkjamenn vilja hafa jákvæð áhrif á Íslendinga og miðla reynslu sinni. „Við vorum áður stærsta hvalveiðiþjóð í heimi – ef við förum aftur til nítjándu aldar. Bandaríkin fóru úr því að vera hvalveiðiþjóð yfir í að stunda hvalaskoðun og vernda hvalastofna. Okkar reynsla er að hvalaskoðun er miklu arðbærari en hvalveiðar,“ segir Cunningham og bætir við að lokum:



„Bandaríkjaforseti vill því vinna með Íslendingum að fara þessar leiðir.“