Róbert fékk batakveðjur af Alþingi

„Héðan frá Alþingi eru honum og fjölskyldu hans sendar kveðjur með ósk um góðan og skjótan bata,“ sagði Einar K. Guðfinnsson, forseti Alþingis, við setningu þingfundar í dag.

Róbert Marshall, þingmaður Bjartar framtíðar, ók vélsleða fram af hengju við Hlöðufell á laugardag. Var hann fluttur með þyrlu á Landspítala þar sem hann hefur verið síðan.

Alls tóku um 40 manns þátt í aðgerðinni á vélsleðum og snjóbílum, auk þess sem fjallabjörgunarmenn voru til taks á Þingvöllum. Erfiðlega gekk að finna slysstaðinn vegna slæms veðurs á svæðinu.

Nýtti forseti tækifærið í upphafi þingfundar til að senda Róberti batakveðjur. Hafði hann á orði að góð von væri, samkvæmt þeim upplýsingum sem hann hefði fyrir hendi, að Róbert næði fullri heilsu á ný innan ekki svo langs tíma.

„Svo er líka ósk okkar og bæn samþingmanna hans.“