Moyes-borðinn verður ekki tekinn niður

David Moyes, knattspyrnustjóri Manchester United, hefur mátt þola ýmislegt á sínu fyrsta tímabili sem stjóri liðsins en hann sleppur þó líklega við að sjá borðann „sinn“ tekinn niður.

Stretford End Flags, SEF, stuðningsmannafélag Manchester United sem sér um að kaupa, hengja upp og viðhalda borðunum í Stretford End-stúkunni fékk 400 dygga aðdáendur félagsins til að leggja út fyrir „Sá útvaldi“-borðanum sem prýtt hefur miðsvalirnar í stúkunni á tímabilinu.

Fjölmargir stuðningsmenn Manchester United hafa heimtað á samfélagsmiðlum eins og Twitter og Facebook að borðinn verði rifinn niður vegna slaks gengis liðsins en SEF ætlar ekki að gangast við þeim óskum. Félagið útilokar þó ekki alfarið að borðinn verði tekinn niður.

Starfsmenn Old Trafford stóðu vörð um borðann á leiknum gegn Manchester City í gærkvöldi þar sem óttast var að reiðir stuðningsmenn myndu grípa til eigin ráða og rífa hann sjálfir niður. Borðinn verður einnig undir verndarvæng starfsmanna vallarins um næstu helgi gegn Aston villa.

Komi til greina að taka borðann niður mun atkvæðagreiðsla á milli stuðningsmannanna 400 sem borguðu brúsann ráða för en ekki hróp og köll annarra aðdáenda félagsins á samfélagsmiðlum, að því fram kemur í frétt The Telegraph í dag.