Ógnaði konu með skærum og krafðist kynmaka

Þingfesting var í máli hins opinbera gegn Óðni Frey Valgeirssyni í Héraðsdómi Reykjavíkur í morgun en hann er ákærður fyrir frelsissviptingu, líkamsárás og hótanir, með því að hafa, sunnudaginn 11. mars 2012, veist með ofbeldi og hótunum að konu á þrítugsaldri á þáverandi heimili hans.

Ákærði mætti ekki fyrir dóm í morgun og enginn lögmaður á hans vegum viðstaddur dómshaldið. Því var ekki hægt að birta honum ákæruna. Málinu var því frestað til 20. mars en ríkisvaldið mun því næst hafa upp á manninum og færa hann fyrir dóm.

Í ákærunni er Óðni Frey gefið að sök að hafa meinað konunni útgöngu úr læstu herbergi í tvær klukkustundir. Óðinn hafi hrint konunni ítrekað, rifið í og dregið hana á hárinu.

Maðurinn er einnig ákærður fyrir að hafa slegið konuna með flötum lófa og sparkaði einu sinni í hægra hné hennar.

Óðinn á einnig að hafa hótað konunni lífláti ef hann fengi ekki að hafa kynmök við hana. Þá hafi hann haldið á opnum skærum sem hann ógnaði henni með að því er segir í ákærunni.

Þess er krafist að ákærði verði dæmdur til refsingar og til greiðslu alls sakarkostnaðar. Konan gerir kröfu um að Óðni verði gert að greiða henni miskabætur upp á þrjár milljónir ásamt vöxtum.

Hefur áður komið við sögu lögreglu

Héraðsdómur Reykjavíkur dæmdi Óðinn Frey í þriggja ára óskilorðsbundið fangelsi árið 2011 fyrir að hafa hafa ráðist á sextán ára gamla stúlku á göngustíg í Laugardal í október 2010, slegið hana ítrekað með hörðu áhaldi í höfuð og tekið hana hálstaki og þrengt að þar til hún missti meðvitund.

Hann var síðan sýknaður af ákærunni í Hæstarétti 29. september árið 2011.

Þá komst Hæstiréttur að þeirri niðurstöðu að ágallar á skýrslutökum lögreglu af systur Óðins væru þess eðlis að ekki væri hægt að líta til skýrslnanna við úrlausn málsins. Hún hafði hvorki verið upplýst með fullnægjandi hætti um réttarstöðu sína sem vitnis né um það hverjir myndu fá aðgang að upptökum af skýrslutökunum.

Einnig var fundið að því að ekki hefði farið fram rannsókn á erfðaefni á blóðsýnum sem tekin voru á vettvangi árásarinnar, myndir af áverkum stelpunnar hefðu ekki verið í gögnum málsins og að skort hefði greinargóðar lýsingar á hæð og útliti Óðins og árásarþolans.