Allt að tíu íslenskir frystitogarar til Grænlands

Útlit er fyrir að allt að tíu íslensksir frystitogarar og fjölveiðiskip muni stunda kolmunnaveiðar í grænlenskri lögsögu á komandi vertíð, en margar þjóðir berjast nú um heimildirnar. Íslendingar virðast vera að ná forskoti með því að kaupa sig í stórum stíl inn í grænlenskar útgerðir og skrá íslensk skip í Grænlandi.

Á síðustu makrílvertíð við Grænland, sem var einskonar tilraunavertíð, voru sjö af 18 skipum, sem stunduðu veiðarnar íslensk, og nær undantekningarlaust skráð á Íslandi, en nú er í ráði að skrá mörg íslensku skipanna, sem veiddu þar í fyrra, og fleiri til viðbótar í Grænlandi, með sameiginlegri eignaraðild Íslendinga og Grænlenskra útvegsfyrirtækja.

Í þeim tilvikum, sem grænlensk félög tóku íslensk skip á leigu til að veiða heimildir félaganna í fyrra, voru greiddar 20 krónur á kílóið í veiðigjald, en síðan sáu útgerðir skipanna um sölu afurða og kostnað við veiðarnar.

Í þeim tilvikum eru áhafnir íslenskar, en með því að skrá skipin í Grænlandi þarf ákveðið hlutfall áhafana að vera grænlendingar og grænlenskir samningar gildi um borð, en að sögn sjómannaforustunnar hér á landi gefa grænlensku samningarnir sjómönnum allt að 30 prósentum minna í aðra hönd en íslensku samningarnir.

Talið er að kvóti Grænlendinga á næstu vertíð gæti orðið á bilinu 60 til hundrað þúsund tonn og að afurðaverðið hlaupi jafnvel á tugum milljarða króna.