Norsku loðnuskipin gefast upp

Norðmenn hafa gefist upp á loðnuleitinni hér við land og tóku skipin að streyma heim á leið í nótt. Að minnstakosti tíu skip tilkynntu um heimferð í gærkvöldi og í nótt og áður voru nokkur skip farin heim aflalaus.

Veiðiheimildir þeirra hér við landi gilda til miðnættis annað kvöld og í fyrradag fóru Norðmenn fram á það við sjávarútvegsráðuneytið að tímabilið yrði framlengt, en í gær hafði ekkert svar borist, sem Norðmenn virðast túlka sem að farmlenging sé ekki í boði.

Nokkur norsku skipanna hafa fengið smá slatta undanfarnar vikur og landað þeim hér á landi, þannig að engin loðna berst til Noregs af þesari vertíð. Íslensku loðnuskipin eru að veiðum suður af landinu og ganga þær treglega.