Nauðsynlegt að tvöfalda Hvalfjarðargöng

Talið er að tvöfalda þurfi Hvalfjarðargöng vegna sífelldrar aukningar á umferð ef göngin eiga að geta staðist tilsett öryggisskilyrði.

Samningur Spalar við ríkið, varðandi innheimtu á veggjaldi um Hvalfjarðargöng, lýkur um áramótin 2018 og segir Gísli Gíslason, stjórnarformaður Spalar, að stærsta spurningin sé sú hvort sátt náist á áframhaldandi gjaldtöku en ef svo fari verði gjaldtaka með sambærilegum hætti

„Málið er þannig lagað í biðstöðu en við höfum verið að vekja til máls á þessu með reglulegu millibili. Það er nauðsynlegt að hafa stefnu í þessu máli og byrja þarf að undirbúa málið sem fyrst en málið er nú á herðum stjórnvalda. Ég tel þetta þó ekki vera efst á þeirra forgangslista.“

Búið er að setja upp grófa kostnaðaráætlun og er gert ráð fyrir að verkefnið muni kosta um 9 milljarða en Gísli segir að ýmis óvissa sé varðandi fjármögnun verkefnisins og á hvaða kjörum það gæti verið. Undirbúningur fyrir verkefni sem þetta mun taka um eitt og hálft ár og uppbygging mun taka um tvö ár. Það er um sama leiti og núverandi samningur fellur úr gildi.

Gísli segir öryggismál vera meginatriði og byggist það á því að göngin hafi nú verið uppfærð miðað við reglur sem gilda um gjaldgöng og með aukinni umferð sé ekki líklegt að til séu mörg úrræði á meðan um einungis ein göng sé að ræða.

„Áhættustuðlar hækka með aukinni umferð og upp að vissu marki geta göngin þjónað sínu hlutverki en þegar komið er upp fyrir ákveðin umferðarmörk þá verður ekkert undan því komist að horfa á ný göng.“

Umferð minnkaði verulega árið 2007 en er byrjuð að aukast jafnt og þétt á milli ára. Árið 2012 varð 2,5% aukning á umferð og fóru 1.886 þúsund bílar um göngin. Hann telur að samdráttarárin frá 2008 séu nú að baki telur hann miklar líkur á því að umferð muni halda áfram að aukast. Hann segir að ef uppbygging hefst þá þurfi samhliða því að bæta veginn um Kjalarnes.