"Batnandi mönnum er best að lifa“

„Ég er ánægð með framgang mála,“ segir Eyrún Björg Guðmundsdóttir, 18 ára nemandi við Menntaskólann á Akureyri og þátttakandi í Morfís, mælsku- og rökræðukeppni framhaldsskóla Íslands.

Eyrún þakkar fyrir stuðninginn og ómetanleg viðbrögð við bréfi Ölmu Oddgeirsdóttur, aðstoðarskólameistara MA til stjórnar Morfís. Eins og fram hefur komið voru samskipti Eyrúnar við liðsmenn ræðuliðs Menntaskólans á Ísafirði rakin og voru piltarnir í liðinu sakaðir um grófa áreitni og kvenfyrirlitningu í garð Eyrúnar.

Ræðuliðið sendi frá sér yfirlýsingu á föstudaginn þar sem þeir báðu afsökunar á ummælunum og ógeðsleg orð hefðu fallið sem ekki hefðu átt að heyrast. Liðið sagðist myndu læra af þessu og stefndi í framtíðinni á að sýna öðrum keppendum meiri virðingu.

Liðsstjóri ræðuliðsins ákvað í kjölfarið að hætta sem þjálfari liðsins. Hann segist ekki hafa haft nokkuð með þessi ummæli að gera og hann hafði strax samband við Eyrúnu að keppni lokinni og baðst afsökunar á framferði piltanna.

Tekur mark á afsökunarbeiðnunum

Eyrún segist taka mark á afsökunarbeiðnunum. „Batnandi mönnum er best að lifa,“ segir hún.

Eyrún segir stuðninginn sem hefur fengið vegna málsins ómetanlegan. Ekki aðeins hafi hún fengið stuðning frá fjölskyldu og vinum heldur hafi fjölmargir sent henni skilaboð í gegnum Facebook og einnig hafi fólk hringt í hana. „Þetta hefur jafnvel verið fólk sem ég þekki ekki neitt,“ segir hún.

Hún ákvað að fylgjast ekki með því sem skrifað er við fréttirnar sem birst hafa af málinu. Mamma hennar hafi séð um það en að hennar sögn voru flest skrifin jákvæð. „Það er auðvitað þannig að þegar það er umfjöllun um mann þá er hún manni í hag að einhverju leyti en líka í óhag. Ég held samt að flestir hafi tekið þessu ósköp vel og verið sammála mér um að svona eigi ekki að líðast,“ segir Eyrún.

Beita sér fyrir lagabreytingu

Stjórn Morfís sendi einnig frá sér yfirlýsingu vegna málsins. Þar lýsti stjórnin yfir andstyggð á framkomu liðs MÍ gagnvart liði MA í keppni þeirra á milli 7. febrúar síðastliðinn. Hátterni liðsmanna MÍ hafi óhreinkað keppnina og nokkuð réttlæti felist í því að liðið hafi tapað viðureigninni. Stjórnin hyggst beita sér fyrir lagabreytingu á næsta aðalfundi til að koma málum af þessu tagi í viðunandi horf.