Boðar breytingar á lögum um framhaldsskóla

Í setningarræðu Illuga Gunnarssonar mennta- og menningarmálaráðherra á ársfundi IÐNMENNTAR föstudaginn síðastliðinn tilkynnti ráðherra breytingar á lögum um framhaldsskóla sem varða rafrænt námsefni.

Illugi sagði meðal annars að að skólum yrði gert heimilt, með sérstöku leyfi ráðherra, að innheimta gjald fyrir rafrænt efni sem þeir ákveða að nýta í kennslu.

„Gert er ráð fyrir því að ráðherra veiti skólum slíka heimild í tilraunaskyni í takmarkaðan tíma fyrir tilteknar námsgreinar. Nánar verður svo kveðið á um útfærslu, s.s. hámarksupphæðir, greiðslufyrirkomulag og upplýsingaskyldu skóla í reglugerð, “ sagði Illugi í ræðu sinni.

Ársfundur IÐNMENNTAR í ár fór fram á Reykjavík Hilton Nordica undir yfirskriftinni „Rafræn útgáfa – breyttir kennsluhættir.“

Meðal framsögumann var Thomas Skytte, forstjóri Erhvervsskolernes Forlag í Danmörku, sem kynnti reynslu sína af innleiðingu rafræns námsefnis í framhaldsskólum þar í landi. Skytte fjallaði einnig um hugbúnað sem Danir hafa þróað til að selja og dreifa námsefninu til nemenda.  

Nánari upplýsingar má nálgast á vefsíðu IÐNÚ.