„Almennt séð hafa farþegar sýnt skilning á málinu“

„WOW air er knúið til að hætta við fyrirhugað flug til Norður-Ameríku þar sem félagið fékk ekki úthlutaða nauðsynlega brottfarartíma í Keflavík. Þessi niðurstaða hefur ekki eingöngu áhrif á áætlunarflug til Norður-Ameríku heldur einnig fyrirhugaða stækkun félagsins í Evrópu,“ segir Svanhvít Friðriksdóttir, upplýsingafulltrúi WOW air.

Fyrr í dag birtist frétt á Vísi þar sem Anna Rósa Pálmarsdóttir sem segist verða fyrir tjóni vegna þess að fyrirtækið hætti við flug til Stokkhólms.

Þar sem félagið sér sig knúið til þess að hætta við flug til Boston er ekki grundvöllur fyrir því að vera með fimm flugvélar í rekstri. „Fyrir vikið verður WOW air einnig að hætta við flug til Stokkhólms en fimmta flugvélin átti að sinna áætlunarflugi þangað.“

„WOW air hafði fundið fyrir mikilli eftirspurn eftir lægra flugverði frá þessum markaði. Með innkomu WOW air á markaðinn lækkaði flugverð til og frá Stokkhólmi yfir 20% sem er í samræmi við það sem sem sést hefur á öðrum mörkuðum þar sem WOW air hefur veitt virka samkeppni. Við hjá WOW air vonum svo innilega að flugverð muni ekki hækka aftur um 20% eftir að WOW air hættir við að fljúga þangað.“

„Komið verður til móts við þá farþega sem voru búnar að kaupa sér flug að öllu leyti, þeim boðin endurgreiðsla eða annað flug sem þeir geta nýtt sér. Það er algengt að flugfélög þurfi að breyta flugáætlunum sínum og ber þeim ekki skylda til þess að bæta fyrir breytingar á flugáætlun ef svo er gert að lágmarki tveimum vikum fyrir brottför samkvæmt reglugerðum frá Flugmálastjórn Íslands. Sjá reglugerð nr. 1048/2012.“

„Almennt séð hafa farþegar sýnt skilning á málinu og tekið þessum breytingum með jafnaðargeði. Flestir harma að einokun haldi áfram í áætlunarflugi til Stokkhólms,“ segir Svanhvít.