Gagnrýna flutning Fiskistofu

Flutningur Fiskistofu frá Hafnarfirði til Akureyrar er vanhugsuð ákvörðun sem skaðar stofnunina og felur í sér alvarlegt brot á góðum stjórnsýsluháttum.

Þetta segja fyrrverandi fiskistofustjórarnir Þórður Ásgeirsson og Árni Múli Jónasson í grein í Fréttablaðinu í dag.

Vegna þess að nær allir starfsmenn Fiskistofu ætli ekki flytja til Akureyrar til þess að halda vinnu sinni tapist mikil þekking og reynsla.

„Vonandi er unnt að bæta það tjón sem orðið er ef strax er fallið frá flutningi Fiskistofu. Ella er ljóst að verið er að kasta hundruðum milljóna króna á glæ til þess eins að uppfylla fyrirheit sem engin stjórnsýsluleg eða fjárhagsleg rök eru fyrir,“ segir í greininni.