Stofnfiskur seldur til bresks líftæknifélags

Fyrirtækið Stofnfiskur, sem er stærsti framleiðandi laxahrogna hér á landi, hefur verið selt breska líftæknifyrirtækinu Benchmark Holdings plc. Með kaupunum verða erfða- og stofnfiskrannsóknir á laxi hérlendis efldar, og hrognaframleiðsla aukin mikið.

Jónas Jónasson, framkvæmdastjóri Stofnfisks, segir að sala félagsins á þessum tímapunkti skýrist af þörfinni til að styrkja reksturinn til framtíðar og auka umsvif. „Áherslurnar breytast ekki, en þetta félag hefur víðtæka þekkingu á fiskeldi og vill bæta erfðarannsóknum við sín umsvif. Þeir eru mjög áhugasamir um rannsóknir og þróun og sá hluti fyrirtækisins verður efldur mikið,“ segir Jónas.

Jónas segir að framleiðslugeta Stofnfisks sé mun meiri en framleiðsla dagsins í dag. Nú eru framleidd 60 til 70 milljón hrogn á ári og velta Stofnfisks er um 1,5 milljarðar á þessu ári, en Jónas segir markmiðið að tvöfalda umsvif fyrirtækisins á næstu þremur árum. Jónas vonar að þetta þýði fleiri störf en þegar starfa 43 hjá félaginu.

Langstærsti hluthafi Stofnfisks var HB Grandi, með tæp 65% hlutafjár og nemur söluverð hlutarins tæpum tveimur milljörðum íslenskra króna. Söluverð hlutanna getur þó hækkað nái Stofnfiskur hf. sölumarkmiðum sínum innan þriggja ára en hæst getur söluverð hlutanna numið rúmum þremur milljörðum. Að auki verður rekstrarlán HB Granda til Stofnfisks, sem nam um 1,4 milljörðum króna í árslok 2013, greitt upp af hálfu Stofnfisks hf. í kjölfar sölunnar. Stofnfiskur hefur vaxið hratt og engin launung á því að áhugi á félaginu var orðinn mikill erlendis, það endurspeglast í því að kaupverðið er mun hærra en

HB Grandi hafði gert ráð fyrir í sínum bókum árið 2013.

Benchmark Holdings kaupir tæp 82% hlutabréfa í Stofnfiski, en gekk á sama tíma frá kaupum á öllu hlutafé norska fyrirtækisins SalmoBreed AS. Ætlunin er að slá starfsemi fyrirtækjanna saman.

„Þeir keyptu þetta fyrirtæki á sama tíma í viðleitni sinni til að gera þetta að mjög öflugu alþjóðlegu fyrirtæki,“ segir Jónas sem veit ekki hvort nafnið, Stofnfiskur, fær að halda sér.