Raúl í fótspor Pele

Spænski knattspyrnumaðurinn Raúl er ekkert á því að leggja fótboltaskóna á hilluna því þessi 37 ára gamli framherji er nú á leiðinni í bandarísku atvinnumannadeildina.

Enski og spænskir fjölmiðlar sögðu frá því í kvöld að Raúl hafi gert samning við New York Cosmos í MLS-deildinni en auk þess að spila með liðinu verður hann yfirmaður unglinga-akademíu félagsins.

Raúl fylgir þar með í fótspor Pele sem spilaði með New York Cosmos á áttunda áratugnum (1975–1977) en Pele var 35 ára gamall þegar hann hætti í brasilíska boltanum og skellti sér norður til New York.

Raúl lék í sextán ár með Real Madrid og vann spænsku deildina sex sinnum og Meistaradeildina þrisvar sinnum á þeim tíma.

Raúl lék síðast með Al-Saad í Katar í mars en þar áður spilaði hann með þýska liðinu Schalke 04.

Orðrómur var um að Real Madrid hafi viljað fá Raúl aftur heim og boðið honum starf sem tæknilegur ráðgjafi. Það virðist vera sem svo að Raúl hafi ekki viljað leggja skóna á hilluna eða að boð New York Cosmos hafi verið hreinlega of gott til þess að hafna því.