Pin-númerafólk iðki hreinlæti

Mikil pin-númeravæðing hefur verið hér á landi og nú er svo komið að viðskiptavinir þurfa víðast hvar sjálfir að slá inn pin-númerin er þeir borga með kortum.

Spurður hvort aukin smithætta fylgi þessari þróun segir Haraldur Briem sóttvarnarlæknir að slík hætta geti verið til staðar. „Þetta er eins og með yfirborð sem margir snerta á, hvort sem það eru takkar eða eitthvað annað,“ segir Haraldur. „En almenna reglan er að menn þvoi sér um hendurnar. Hvort pin-númerin eru eitthvað verri en hurðarhúnn eða annað er erfitt að segja til um. Þetta er möguleiki og smitsjúkdómar berast meðal annars um út af þessu. Þetta er eitthvað sem menn ættu að hugsa um.“

Haraldur bætir við að í Asíu noti menn yfirleitt hanska þegar þeir koma við takka. „En ég er ekkert að mæla með því, heldur almennu hreinlæti. Að fólk þvoi sér oft og minnki þannig líkurnar á að menga yfirborð og annað.“

Dæmi eru um að sýklahrætt fólk þori ekki að slá inn pin-númer með höndunum, heldur beiti til þess öðrum ráðum.

„Fólk getur gert það með því að hafa blýant eða eitthvað annað. Það er möguleiki að fara í kringum þetta ef menn vilja. En það eru engin gögn sem sanna að pin-númer séu skæðari eða varasamari en eitthvað annað.“