Kvennalistakonur verða ljósberar

UN Women á Íslandi standa fyrir Ljósagöngu á alþjóðlegum baráttudegi Sameinuðu þjóðanna gegn kynbundnu ofbeldi í dag.

„Dagurinn markar upphaf hins alþjóðlega sextán daga átaks gegn kynbundnu ofbeldi,“ segir Inga Dóra Pétursdóttir, framkvæmdastýra UN Women.

Yfirskrift sextán daga átaksins þetta árið er Heimilisfriður – Heimsfriður. Gangan hefst klukkan 19.00 í Alþingisgarðinum.

„Sérstakir heiðursgestir og ljósberar verða að þessu sinni merkiskonur sem áttu þátt í stofnun Kvennalistans fyrir þrjátíu árum og vilja samtökin með þessum hætti heiðra starf þeirra í þágu jafnréttis á Íslandi,“ útskýrir Inga Dóra.

Fimmta árið í röð var Ísland efst á lista Alþjóðaefnahagsráðs yfir ríki þar sem jafnrétti kynjanna mælist mest. „Það má þakka þann mikla árangur frumkvöðlastarfi Kvennalistakvenna en þar má segja að traustur grunnur hafi verið lagður fyrir réttindabaráttu kvenna á Íslandi,“ segir Inga Dóra.

„Við teljum tilefni til að fagna þessum góða árangri í Ljósagöngunni og knýja jafnframt á um þær breytingar sem þörf er á til að fullu jafnrétti sé náð,“ bætir hún við.

Að göngu lokinni munu fulltrúar stofnenda Kvennalistans svo halda erindi í Stúdentakjallaranum.