Þrjú þúsund manns í húsaleigulottói

Hluti leigjenda íbúðanna, sem Reykjavíkurborg hyggst reisa í samstarfi við Félagsbústaði, verður dreginn út í leigulottói. Samkvæmt tillögu Reykjavíkurborgar er gert ráð fyrir að leiguverð á íbúðum í blönduðum íbúðahúsum verði lægra en gerist á almennum markaði, sem muni leiða til þess að eftirspurn verður meiri en framboð. Verður það að hluta til leyst með þeim umsóknarpotti sem dregið verður úr.

Verði tillaga borgarinnar að veruleika munu nýju íbúðirnar standa þrenns konar umsækjendum til boða. Fjórðungur leigjenda verða einstaklingar, sem eiga rétt á sérstökum húsaleigubótum samkvæmt viðmiðum velferðarsviðs Reykjavíkurborgar og munu áfram eiga sama rétt á félagslegu húsnæði. Sá hópur fer því ekki í umsóknarpottinn.

Fjórðungur leigjenda verða einstaklingar sem eiga rétt á almennum húsaleigubótum. Þeir leigjendur verða þeir einu sem fara í umsóknarpott Félagsbústaða.

Þeir munu gangast undir mat hjá velferðarsviði og þurfa að uppfylla þau fjárhagslegu skilyrði sem skilgreind eru hjá Velferðarráðuneytinu um tekju- og eignamörk vegna lánveitinga til leiguíbúða. Þau skilyrði eru mun víðari en miðað er við í úthlutun sérstakra húsaleigubóta.

Í tillögunni segir að samkvæmt greiningu velferðarsviðs uppfylli yfir 90 prósent sem fá almennar húsaleigubætur skilyrðið, eða um 3.000 manns.

Samþykktar umsóknir myndu fara í umsóknarpott Félagsbústaða og utanaðkomandi aðili fenginn til að sjá um útdráttinn. Hver umsókn færi í pott um íbúðir í samræmi við stærð og staðsetningu íbúðar sem sótt er um.

Gert er ráð fyrir að hinn helmingur íbúðanna í hverju húsi verði leigður út til félagasamtaka. Útfærsla á leigusamningi við þann hluta leigjenda liggur ekki fyrir, en í tillögunni segir að æskilegast væri að leigusamningar giltu í fimm ár.

Félagasamtökin myndu endurleigja íbúðirnar til sinna félagsmanna, en ekki væri gert ráð fyrir að þessi hópur uppfyllti að öðru leyti skilyrði Velferðarsviðs varðandi mat á eignum eða tekjum, eða hann fari í umsóknarpottinn.