Segja skipulagsstefnu ekki einkamál stjórnmála- og embættismanna

Íbúasamtök Vesturbæjar lýsa í fréttatilkynningu yfir miklum vonbrigðum með að mótbárur þeirra og rúmlega 400 íbúa og fagmanna, gegn deiliskipulagstillögu fyrir Vesturbugt hafi ekki náð eyrum skipulagsyfirvalda. Tillagan var samþykkt í skipulagsráði Reykjavíkur með smávægilegum breytingum.

Þótt komið hafi verið til móts við ábendingar og tillögur samtakanna að einhverju leyti með því að lækka sum hús um eina hæð, séu þau enn vonsvikin með samþykkt tillögunnar. Einnig segir að niðurstaða vinnuferlis deiliskipulagsins sé mjög umdeild meðal íbúa og fagfólks sem krefjist þess að tillagan og ferlið verði endurskoðað í heild sinni.

„Íbúar vilja nýtt hverfi sem er í beinni tengingu og í samhljómi við gamla Vesturbæinn. Við viljum sjá hverfi sem mun mæta væntingum og þörfum jafnt íbúa sem og allra Reykvíkinga og gesta borgarinnar.“ Enn fremur segir að sigurvegari hugmyndasamkeppninnar sem tillagan var byggð á, setji út á hana og segi hana ekki í samræmi við sínar tillögur og hugmyndir.

Samtökin segjast standa fast á því að skipulagsstefna og ákvarðanir sem tengjast þeim séu ekki einkamál stjórnmála- og embættismanna Reykjavíkur. „Íbúar og fagfólk á að eiga raunverulega aðkomu að ákvörðunum sem tengjast skipulagi í stað þess að kynningar og samráð séu lítið annað en leiktjöld.“



Hægt er að lesa tilkynninguna í heild sinni hér að neðan:

Yfirlýsing Íbúasamtaka Vesturbæjar

Íbúasamtök Vesturbæjar lýsa yfir miklum vonbrigðum með að mótbárur okkar og yfir 400 íbúa og fagmanna sem lýstu sig mótfallna fyrirliggjandi deiliskipulagstillögu fyrir Vesturbugt (hafnarsvæði Vesturbæjar) hafi ekki náð eyrum skipulagsyfirvalda og að tillagan hafi verið samþykkt í skipulagsráði með smávægilegum breytingum.

Þótt skipulagsyfirvöld hafi komið eitthvað til móts við ábendingar og tillögur okkar með því að lækka sum húsin um eina hæð þá erum við vægast sagt vonsvikin með að þessi deiliskipulagstillaga skuli hafi verið samþykkt.

Forsaga málsins er sú að í upphafi var haldin samkeppni um skipulag alls hafnarsvæðisins og henni síðan fylgt eftir með deiliskipulagi. Til verksins valdi skipulagsráðið eina arkitektastofu sem falið var að gera tillögu í takt við hugmyndir valdamannanna sjálfra og í átt við niðurstöðurnar úr samkeppninni.

Niðurstaða þessarar vinnu og vinnuferlisins alls er mjög umdeild bæði meðal íbúa og fagfólks sem krefjast þess að tillagan og ferlið séu endurskoðuð í heild sinni. Íbúar vilja nýtt hverfi sem er í beinni tengingu og í samhljómi við gamla Vesturbæinn. Við viljum sjá hverfi sem mun mæta væntingum og þörfum jafnt íbúa sem og allra Reykvíkinga og gesta borgarinnar.

Yfir 400 undirskriftir, fjölmargir arkitektar, teiknistofur og fagmenn hafa tekið undir þessi sjónarmið. Í því sambandi er rétt að árétta að sjálfur sigurvegari hugmyndasamkeppninnar setur verulega út á nýju deiliskipulagstillöguna og segir hana alls ekki vera í samræmi við sínar tillögur og hugmyndir.

Viðbrögð skipulagsráðs voru þau að gera einungis smávægilegar staðbundnar breytingar á tillögunni í stað þess að endurskoða hana í heild sinni. Þeir hlustuðu hvorki á raddir íbúa né fagfólks og hafa forðast að endurskoða þetta skipulag. Það má spyrja hvað þurfi eiginlega að koma til svo að skipulagsyfirvöld endurskoði áætlanir sínar. Hvað þarf til þess að gangrýnisraddir nái eyrum þeirra og litið sé á athugasemdirnar sem efnislegar og réttmætar?

Því miður hefur algjörlega skort á samstarf við íbúa og fagaðila í þessu máli og við höfum haft á tilfinningunni að skipulagsyfirvöld líti á samtök íbúa sem óþægilegan stein í götu sinni frekar en þátttakanda í uppbyggilegri umræðu.

Við stöndum fast á því að skipulagsstefna og ákvarðanir þeim tengdar séu ekki einkamál stjórnmála- og embættismanna borgarinnar. Íbúar og fagfólk á að eiga raunverulega aðkomu að ákvörðunum sem tengjast skipulagi í stað þess að kynningar og samráð sé lítið annað en leiktjöld.

Nú er að vona borgarfulltrúar sjái að sér þegar kosið verður í Borgarráði um þessar tillögur og sjái hér er tækifæri til að gera mun betur en þær hugmyndir sem birtast í núverandi skipulagi og sýna um leið samráð við íbúa í verki. Hér þarf að koma til mun meiri metnaður og líta til hagsmuna heildarinnar, því hafnarsvæðið er ekkert einkamál Vesturbæinga, hvað þá stjórnmála- og embættismanna. Borgarfulltrúum er í lófa lagið að krefjast þess að tillagan verði endurskoðuð í heild sinni, hafi þeir einhvern metnað varðandi bætt skipulag borgarinnar.

Stjórn Íbúasamtaka Vesturbæjar:

Birgir Þröstur Jóhannsson, formaður

Ásta Olaga Magnúsdóttir, ritari og varaformaður

Charlotte Bøving, gjaldkeri

Ásta Kristrún Ólafsdóttir

Gunnar Haraldsson

Gísli Þór Sigurþórsson