Vonandi meiðist enginn um helgina

Sextán af tuttugu og tveimur leikmönnum karlalandsliðs Íslands verða í eldlínunni með félögum sínum í sex evrópskum deildakeppnum um helgina. Tæp vika er í fyrri leikinn gegn Króötum á Laugardalsvelli en flautað verður til leiks klukkan 19 á föstudaginn. Óskandi er að meiðsli taki sig ekki upp hjá neinum leikmönnum liðsins fyrir leikinn mikilvæga.

Alfreð Finnbogason og Sölvi Geir Ottesen léku með liðum sínum í Hollandi og Rússlandi í gær. Auk markvarðanna Gunnleifs Gunnleifssonar og Hannesar Þórs Halldórsson er deildinni lokið hjá þriðja markverðinum, Haraldi Björnssyni, í Noregi.

Þá er hlé á portúgölsku deildinni þar sem Eggert Gunnþór Jónsson og Helgi Valur Daníelsson spila.

Aðrir verða á fullu um helgina. Landsliðsfyrirliðinn Aron Einar Gunnarsson og félagar í Cardiff sækja Aston Villa heim í dag og á morgun taka Gylfi Þór Sigurðsson og félagar í Tottenham á móti Newcastle.

Guðlaugur Victor Pálsson og Kolbeinn Sigþórsson taka þátt í Íslendingaslag NEC Nijmegen og Ajax á morgun. Þrír af Íslendingunum fjórum í Danmörku eiga leik á sunnudeginum og Birkir Már Sævarsson spilar lokaleik tímabilsins með Brann í Noregi þann dag.

Síðastir til að spila áður en helgin er úti verða Ólafur Ingi Skúlason hjá Zulte Waregem í Belgíu og Birkir Bjarnason með Sampdoria á Ítalíu. Lið þeirra eiga leik á sunnudagskvöldið. Landsliðsmennirnir hittast svo á Íslandi á mánudaginn.