Barnavernd Reykjavíkur hefur vísað málefni ungbarnaleikskólans 101 á Bræðraborgarstíg til lögreglu vegna rökstudds gruns um að börn hafi verið beitt ofbeldi á leikskólanum.
Eins og fram hefur komið þá tóku sumarstarfsmenn upp myndbönd af meintu ofbeldi en þau bárust Barnavernd Reykjavíkur fyrst á fimmtudaginn.
Foreldrar í áfalli eftir myndband
Í gær voru foreldrar barns, sem var beitt ofbeldi, kallaðir á fund barnaverndar. Þar fengu þau að sjá myndband sem varðaði þeirra barn. Samkvæmt heimildum Fréttablaðsins má sjá á myndbandinu þar sem kennari í skólanum kemur að ungabarni þar sem það liggur grátandi. Kennarinn á svo að hafa rifið barnið harkalega upp á handleggnum og flengt það. Mun foreldrunum hafa verið verulega brugðið eftir að hafa séð myndskeiðið.
Kennararnir, sem liggja undir grun, eru báðir konur. Önnur er á fimmtugsaldri og hefur starfað hjá leikskólanum síðan árið 2008, meðal annars sem aðstoðarleikskólastjóri. Sú er menntuð í uppeldisfræðum.
Hin konan er rúmlega fimmtug. Hún hefur starfað á leikskólanum frá árinu 2012 og er ófaglærð. Henni er gefið að sök að hafa beitt barnið ofbeldinu sem finna mátti á myndskeiðinu sem foreldrar fengu að sjá í gær.
Óþekk börn í myrkrakompu
Þá eru einnig uppi ásakanir um að börn hafi verið læst inni í myrkvaðri geymslu þar sem þau áttu að hafa verið óþekk. Eins hafa komið fram ásakanir um að kennararnir hafi haldið mat frá börnum sem eiga að hafa sýnt einhvers konar agavandamál.
Skólastjóri leikskólans, Hulda Linda Stefánsdóttir, vísaði fréttamanni á lögfræðing sinn þegar haft var samband við hana vegna málsins í gær. Í yfirlýsingu sem Hulda sendi síðdegis í gær sagði hún orðrétt: „Ég ítreka að ég hef ekki séð myndböndin sjálf, en sýni þau óviðeigandi framkomu við börn þá er það auðvitað á ábyrgð mína sem leikskólastjóri og ég mun ekki víkjast undan henni.“
Eins kemur fram í tilkynningunni að leikskólinn verði áfram lokaður. Ekki náðist í kennarana sem eru ásakaðir um ofbeldi þrátt fyrir ítrekaðar tilraunir Fréttablaðsins.
Í samtali við foreldra á leikskólanum kom fram að þeir væru enn að reyna að átta sig á aðstæðum og væru slegnir. Þá sögðu þeir að upplýsingagjöf hefði verið verulega ábótavant. Boðað er til fundar með foreldrum í næstu viku.
