Innlent

Vindmyllurnar tvær á Hafinu gætu sinnt orkuþörf 1.200 heimila

Vindmyllurnar tvær sem Landsvirkjun setti upp í tilraunaskyni hafa þegar framleitt um 2.660 megavattstundir og gætu annað raforkuþörf 1.200 íslenskra heimila á ársgrundvelli.
Vindmyllurnar tvær sem Landsvirkjun setti upp í tilraunaskyni hafa þegar framleitt um 2.660 megavattstundir og gætu annað raforkuþörf 1.200 íslenskra heimila á ársgrundvelli. Landsvirkjun/Aldís Pálsdóttir

Tilraunaverkefni Landsvirkjunar með beislun vindorku þykir hafa gengið vonum framar. Vindmyllurnar tvær, sem voru settar upp á hraunsléttu norðan við Búrfell, Hafinu svokallaða, undir lok síðasta árs, gætu annað raforkuþörf 1.200 íslenskra heimila.

Úlfar Linnet, deildarstjóri rannsóknardeildar Landsvirkjunar, segir að niðurstöður fyrstu mælinga hafi verið vonum framar.

„Fyrstu mælingar sýna að vindmyllurnar á Hafinu hafa það sem af er ári framleitt 2.660 megavattsstundir,“ segir Úlfar.

„Það er 500 megavattsstundum meiri orka en meðalvindmylla í heiminum hefði náð að vinna, en munurinn svarar til allrar raforkunotkunar 111 heimila.“

Úlfar bætir því við að spennandi verði að sjá hvernig málin muni þróast með haustinu þegar öflugir haustvindar fara að gera vart við sig. Rannsóknin miðar að því að kanna hvort hægt sé að breyta hinu íslenska roki í verðmæta auðlind; hvernig sé að reka vindmyllur við séríslenskar aðstæður og hvaða áhrif ísing, skafrenningur og sand- og öskufok hafi þar á.

Vindmyllurnar eru hvor um sig um 900 vött. Áætluð ársframleiðsla þeirra beggja er 5,4 gígavattsstundir og myndi nægja til að sjá um 1.200 íslenskum heimilum fyrir raforku til daglegra nota, eins og fyrr segir.

Staðsetningin á Hafinu ræðst af aðstæðum, en þar liggja náttúruleg vindgöng með stöðugum vindstyrk á bilinu tíu til tólf metrar á sekúndu. Þá er þar lítið fuglalíf og nægt rými til að setja upp fleiri myllur ef þurfa þykir.

Notkun vindorku hefur aukist mikið á heimsvísu síðustu ár og komu til dæmis þrjú prósent af allri raforkuframleiðslu heimsins í fyrra frá vindmyllum, að því er fram kemur í upplýsingum frá Landsvirkjun. Þá spá Alþjóðlegu vindorkusamtökin því að uppsett afl frá vindmyllum muni tvöfaldast í heiminum fyrir lok árs 2016.

Aðspurður um framhaldið hér á landi segir Úlfar að möguleikarnir séu miklir.
„Til framtíðar getur vindorka hugsanlega orðið þriðja stoðin í orkukerfi Landsvirkjunar.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.