Reykjavík og Ríkisskattstjóri með bestu vefina

Reykjavíkurborg og Ríkisskattstjóri fengu í gær viðurkenningu fyrir bestu vefina meðal sveitarfélaga og ríkisstofnana. Þetta kemur fram á vef innanríkisráðuneytisins.

Kannanir á gæðum opinberra vefja hafa farið fram annað hvert ár frá árinu 2005. Vefirnir eru metnir út frá innihaldi, nytsemi, aðgengi fyrir fatlaða, þjónustu og möguleikum almennings til lýðræðislegrar þátttöku. Alls voru kannaðir 265 vefir.

Viðurkenningarnar voru afhentar á fjölsóttri ráðstefnu þar sem fjallað var um stefnuna um upplýsingasamfélagið og þau verkefni sem henni tengjast. Ráðstefnan var haldin á vegum innanríkisráðuneytis, Sambands íslenskra sveitarfélaga og Ský, Skýrslutæknifélags Íslands.