Landsliðsþjálfararnir spurðu blaðamenn álits

Allir leikmenn íslenska karlalandsliðsins verða klárir í slaginn í Osló ef frá er talinn Ólafur Ingi Skúlason sem er tognaður aftan í læri.

Lars Lagerbäck og Heimir Hallgrímsson staðfestu á blaðamannafundi í kvöld að Ólafur Ingi myndi ekki ná sér fyrir leikinn í Osló. Aðspurður hvort einhver yrði kallaður í hópinn í hans stað sagði sá sænski:

„Nei, ætli það. Eða ég veit það ekki, hvað finnst þér Heimir?“

Heimir svaraði að bragði að ætli það væri ekki best að þeir ræddu það síðar í kvöld en horfði svo í átt til undirritaðs.

„Hvað finnst þér að við ættum að gera?“

Undirritaður lagði til að maður yrði kallaður í stað Ólafs Inga sem félagarnir sögðust myndu taka til umhugsunar.

Ólafur Ingi verður hér á landi til sunnudags líkt og aðrir leikmenn liðsins. Hann heldur þá til Belgíu þegar kollegar hans stíga upp í vélina til Osló.