Mun mæða mikið á dómaranum

Lars Lagerbäck hefur töluverðar áhyggjur af hörkunni í Slóvenum og býst við að dómarinn verði í aðalhlutverki í leiknum í kvöld.

Slóvenska liðið sýndi mikla hörku í vináttulandsleiknum gegn Tyrkjum í síðustu viku og voru beinlínis grófir.

„Ég vona að leikmenn mínir geti einbeitt sér einungis að leiknum á morgun,“ segir Lagerbäck.

„Við þurfum ekki að hræðast neitt varðandi leikskipulagið hjá þeim en við þurfum aftur á móti að bera mikla virðingu fyrir þeim. Ég hef miklar áhyggjur af hlutverki dómarans í leiknum á morgun. Slóvenar voru gríðarlega grófir gegn Tyrkjum í síðustu viku og þetta verður líklega erfitt verkefni fyrir dómaratríóið.“

Þjóðverjinn Felix Zwayer mun dæma leikinn í kvöld.

„Þetta verður gríðarlega líkamlegur leikur og við verðum að vera skynsamir. Leikmenn liðsins þurfa að vera einbeittir allan leikinn og þá sérstaklega þegar Slóvenar fá tækifæri úr föstum leikatriðum,“ segir Lagerbäck.