100 kílómetra langt Austurstræti

Hugmynd ferðaþjónustufólks á Austurlandi um 100 kílómetra gönguleið á milli Lóns og Fljótsdals er komin á góðan rekspöl. Austurstræti, eins og leiðin er kölluð, er hugsuð sem valkostur við lengri gönguleiðir eins og Laugaveginn. Það mun taka útivistarfólk eina viku að ganga strætið enda á milli.

Ekkert bendir til annars en að rík þörf sé á þessum valkosti því sífellt fleiri Íslendingar fara í lengri gönguferðir og stór hluti erlendra ferðamanna sækist eftir slíkum tengslum við náttúruna. Einnig er æskilegt að byggja upp slíka leið í ljósi umræðu um dreifingu ferðamanna um landið og álag á þá staði sem eru vinsælir.

Byggt á gömlum merg

Gunnlaugur B. Ólafsson, sem ásamt Steingrími Karlssyni kynnti hugmyndina fyrir áhugasömum fyrir helgi, segir að byggt sé á eldri gönguleið frá Snæfelli í Lón með erfiðri dagleið yfir Eyjabakkajökul. Því eru 80% leiðarinnar þegar tilbúin, en margt þó breytt. Annars vegar er Lónmegin kominn skáli við Eskifell og 95 metra göngubrú við Einstigi sem opnar leið til byggðar. Hins vegar er Fljótsdalsmegin komin akfær brú yfir Jökulsá og byggt hefur verið upp stórglæsilegt gistihús við Laugarfell. Þá hefur Óbyggðasafn risið á bænum Egilsstöðum og gestastofa þjóðgarðs á Skriðuklaustri. Því byrjar leiðin og endar á tveimur sögulegum stöðum.

Gunnlaugur segir að einn hlekk vanti inn í þessa keðju svo hún sé samfelld milli byggða, en um 27 kílómetrar eru í beinni loftlínu milli skála í Geldingafelli og gistihúss í Laugarfelli. „Eftir að hafa legið yfir kortum var stungið upp á því að setja nýtt skálasvæði á miðri leið við Eyjabakkafoss, sem Fljótsdalshreppur hefur síðan tekið tillit til við endurskoðun á aðalskipulagi. Með þessari útfærslu er komin aðgengileg leið um ævintýralegt þversnið af íslenskri náttúru. Ein lengsta og best útbúna gönguleiðin yfir hálendið,“ segir Gunnlaugur og bætir við að skálarnir á leiðinni séu meira og minna tómir yfir mesta ferðamannatímann. Þegar eru fimm skálar fyrir hendi.

Hægur ferðamáti

Hugsunin á bak við nýja gönguleið er ekki síst sú að svara kalli ferðaþjónustunnar um nýja viðkomustaði fyrir ferðamenn hér á landi. Þar er í forgrunni að dreifa álaginu af fjölgun ferðamanna. Fréttablaðið hefur sérstaklega fjallað um ástand gönguleiðarinnar á milli Landmannalauga og Þórsmerkur – Laugaveginn.

Gunnlaugur segir að sífellt fleiri vilji taka sér tíma og njóta náttúrunnar í anda hins hæga ferðamáta [slow travel]. Eftirspurn eftir lengri gönguleiðum sé því vissulega fyrir hendi, og þær séu fáar hérlendis. Hann segir að eftir engu sé að bíða, í spilunum sé að ferðamannastraumur aukist verulega á Austurlandi og þegar það gerist megi menn ekki eiga grunnvinnuna eftir.