Stefán Máni sakaður um ritstuld

Þrjár blaðsíður úr nýjustu skáldsögu Stefáns Mána, Grimmd, þykja ótrúlega líkar, jafnvel bein þýðing á bloggfærslu sem gengið hefur um netheima af vefnum wordpress.com, sem fjallar um samskipti afgreiðslumanns í stórmarkaði við viðskiptavin.

Haukur S. Magnússon, ritstjóri Reykjavík Grapevine, bendir á þetta í færslu á Facebook síðu sinni auk þess sem hann birtir myndir af þremur blaðsíðum úr Grimmd og þykja mönnum líkindin vera slík að það jaðri við ritstuld. Haukur tekur þó sjálfur fram að hann vilji ekki saka neinn um ritstuld en honum þyki þetta letilegt.

Stefán Máni sagði í samtali við Vísi að hann hefði ekki þýtt neitt efni og notað í bókina Grimmd. Hann kannaðist í fyrstu ekki við bloggfærsluna af Wordpress en þegar blaðamaður hóf lestur úr færslunni fyrir hann þá kannaðist hann um leið við færsluna og sagði þetta mögulega hafa verið klaufaskap af sinni hálfu enda muni hann vel eftir þessum fjöldapósti.

„Ég man eftir þessu og ég las þetta og já, þá hefur það bara verið klaufaskapur í mér því ég man alveg eftir þessum fjöldapósti," sagði Stefán Máni.

Rétt er þó að taka fram að enginn höfundur er titlaður undir bloggfærslunni á Wordpress og virðist höfundur vera ókunnur.

Vísir hafði samband við lögfræðing sem starfar á sviði höfundarréttar. Hann sagði það ekki alveg klippt og skorið hver staðan væri í slíkum tilvikum. Hann segir að sá sem skrifar söguna upphaflega eigi höfundarrétt á henni. Ef þetta hafi aldrei verið birt undir nafni eða enginn gefið sig fram sem höfund þá sé höfundurrétturinn tiltölulega óljós og erfitt sé við slíkt að eiga, þá sé þetta nánast eins og hver önnur flökkusaga, eða eitthvað slíkt og því verði ekki séð að brotið sé á höfundarrétti neins, nema auðvitað að höfundurinn gefi sig fram.