Bendtner skoraði í sigri Arsenal

Arsenal heldur toppsæti sínu í enska boltanum en liðið vann frekar öruggan sigur, 2-0, á Hull City Tigers í kvöld.

Daninn Nicklas Bendnter var frekar óvænt í liði Arsenal en hann hefur ekki þótt sýna neina meistaratakta í vetur.

Bendtner var fljótur að endurgjalda traustið því hann kom Arsenal yfir í leiknum eftir rúmlega mínútuleik. Ótrúleg byrjun hjá honum.

Þannig stóðu leikar í hálfleik en Arsenal lék sama leikinn í upphafi þess síðari að skora strax. Að þessu sinni var Þjóðverjinn Mesut Özil á skotskónum.

Þessi tvö mörk dugðu til þess að Arsenal er enn með fjögurra stiga forskot á toppnum.