Nítján ára í 18 mánaða fangelsi

Nítján ára gamall pólskur piltur var dæmdur í 18 mánaða óskilorðsbundið fangelsi í Héraðsdómi Reykjavíkur í dag fyrir stórfellt fíkniefnasmygl.

Pilturinn var handtekinn á Keflavíkurflugvelli þann 8. september síðastliðinn, stuttu eftir að hann kom með flugi frá Dusseldorf í Þýskalandi. Á honum fannast rúmlega hálft kíló af kókaíni, sem mældist að meðaltali 65% að styrkleika.

Hann faldi efnin í líkama sínum í 56 pakkningum. Maðurinn játaði brot sitt fyrir dómi.

Við rannsókn lögreglu kom fram að „dökkur maður hafi keypt flugmiða og hótelbókun“ í nafni piltsins deginum áður og greitt með peningum á ferðaskrifstofu í Póllandi. Pilturinn kvaðst hins vegar ekki hafa rekist á manninn þar sem hann ráfaði um lestarstöðina í Dusseldorf.

Maðurinn bauð honum að flytja efnin til Íslands, og sagði pilturinn að hann hafi haldið að um hálf kíló af efnum væri að ræða.

Í síma piltsins fundust einnig sms-skilaboð þar sem meðal annars stóð: „Ertu sloppin í gegn, er að bíða eftir flugi.“

Í dómnum segir að pilturinn hafi ekki verið samvinnuþýður né veitt upplýsingar um hugsanlega samstarfsmenn.

„Þó að framburður hans um að hann hafi eingöngu verið burðardýr sé ekki metinn ótrúverðugur er framburður ákærða um aðdraganda ferðarinnar í öllu ótrúverðugur,“ segir í dómnum.

Þá segir dómarinn að ekki skuli milda dóminn vegna ungs aldurs þar sem svo virðist sem pilturinn hafi eingöngu farið í þessa ferð vegna þess að hann var félaus og ekkert hafi komið fram sem bendi til þess að hann hafi verið neyddur í hana.