Eiður: Jólin komu fyrr á Íslandi

Eiður Smári Guðjohnsen leikur í kvöld gríðarlega mikilvægan leik með íslenska landsliðinu í knattspyrnu þegar það mætir því króatíska í fyrri umspilsleiknum um sæti á HM í Brasilíu.

Leikurinn fer fram á Laugardalsvellinum í kvöld og síðari leikurinn síðan á þriðjudagskvöldið í Króatíu.

Eiður hefur á sínum ferli tekið þátt í gríðarlega mikilvægum leikjum með Chelsea og Barcelona en leikmaðurinn vann titla með báðum liðum.

Þessi 35 ára leikmaður hefur nýst landsliðinu vel í undankeppninni og kemur ákveðin ró yfir liðið þegar Eiður er inn á vellinum.

„Þetta er bara ótrúlega skemmtilegur tími og mér líður vel,“ sagði Eiður í viðtali við The Guardian.

„Við gerum okkur fyllilega grein fyrir þeirri eftirvæntingu sem er í þjóðfélaginu hér á Ísland. Það er líkt og fólk sé að telja niður dagana fram að jólum og ótrúlegt andrúmsloft í þjóðfélaginu. Fólk hefur aldrei upplifað þessa tilfinningu hér og mikil spenna í landinu þessa dagana.“

„Liðið hefur nú þegar afrekað eitthvað sem ekkert íslenskt landslið hefur náð. Íslenska liðið er fyrsta liðið í sögunni til að komast í umspil eftir að hafa farið inn í riðlakeppnina í sjötta og neðsta styrkleikaflokki. Afrek okkar er mikið en við getum náð enn lengra.“

„Ég lék minn fyrsta landsleik árið 1996 og ef maður ber saman andrúmsloftið þá og í dag þá er himin og haf þar á milli. Íslendingar hafa aldrei verið eins spenntir fyrir einum leik.“

„Það er ákveðin kynslóð í þessu liði sem hefur farið alla leið á stórmót þegar U-21 árs landslið okkar komst á lokakeppni Evrópumótsins í Danmörku um árið. Leikmenn liðsins leika margir hverjir í hæsta gæðaflokki hjá góðum félagsliðum og hafa spilað saman með landsliðum Íslands í mörg ár.“

„Árangur okkar má vissulega rekja til þeirra knattspyrnuhalla sem hafa risið hér á landi undanfarinn áratug.  Margir leikmenn íslenska liðsins voru þá um tíu ára og hafa því alist upp við frábærar aðstæður.“

„Nú eru um tíu knattspyrnuhallir á Íslandi og því er hægt að æfa allt árið um kring en áður fyrr var í raun aðeins hægt að spila fótbolta á grasi í fimm til sex mánuði á ári.“

Króatar skiptu um landsliðsþjálfara fyrir leikina gegn Íslendingum og mun Niko Kovac stýra liðinu í kvöld.

„Þetta hefur í raun verið saga liðsins í þessari undankeppni. Þetta í fjórða liðið sem við mætum sem hefur skipt um landsliðsþjálfa. Við kunnum því að undirbúa okkur fyrir slíkar aðstæður. Það var alltaf ljóst að við myndum mæta sterkum andstæðingi í þessu umspili og þurftum alltaf að eiga tvo frábæra leiki til að eiga möguleika á því að komast á heimsmeistaramótið.“