„Ef ég segi að barnið mitt hefði dáið ef ekki hefði verið fyrir flugvöllinn er rökræðan búin“

Brjálaður „hlustandi“ hringdi inn í útvarpsþáttinn Bakaríið um helgina vegna flugvallarmálsins og hefur upptaka af símtalinu vakið viðbrögð margra. Um leikið atriði var að ræða og endaði símtalið á þá leið að „hlustandinn“ skaut fjölskyldu sína til bana og að lokum sjálfan sig.

Rúnar Freyr Gíslason, leikari og annar umsjónarmaður Bakarísins, segir að atriðið hafi verið ádeila á hitann í umræðunni um flugvöllinn.

„Það hringja oft alveg bilaðir menn til okkar, enda er Bylgjan með tugi þúsunda hlustenda og eðlilegt að allar skoðanir komi fram,“ segir Rúnar en bætir því við að auðvitað hafi atriðið verið grín.

„Okkur fannst bæði fáránlegt að einhver myndi ganga svona langt en svo var þetta í leiðinni ádeila á málflutning þeirra sem hafa ýtt fram fólki sem segir að flugvöllurinn hafi bjargað lífi þeirra. Þar stoppar rökræðan. Ef ég kem og segi að barnið mitt hefði dáið ef ekki hefði verið fyrir flugvöllinn er rökræðan búin.“

Viðbrögðin góð

Rúnar segist hafa heyrt af einhverjum kvörtunum sem útvarpsstöðinni hefði borist en fyrir utan það hafi viðbrögðin verið ótrúlega góð.

„Við leggjum stundum örlítinn hluta þáttarins undir smá pönk og vitleysu en það þarf enginn að hafa áhyggjur af því. Þátturinn höfðar til allra. En ætli ég geri ekki bara eins og stjórnmálamennirnir og segi: „Hafi einhver skaðast á þessu þá biðst ég auðmjúklega afsökunar“.“

Upptöku af símtalinu má heyra í spilaranum hér fyrir ofan.