„Við vildum koma með skemmtilegan samstöðubjór,“ segir bruggmeistarinn Sturlaugur Jón Björnsson hjá Borg Brugghús sem mun í næstu viku hefja sölu á sérstökum Gay Pride bjór.

„Hann heitir Ástríkur til þess að undirstrika alla þá ást og hamingju sem að umlykur þetta samfélag," segir Sturlaugur „En þetta er einmitt líka nafnið á teiknimyndapersónunni Ástríki sem að kemur frá hinum frönsku Niðurlöndum. Því þótti okkur við hæfi að skella í belgíu inspíreraðan bjór.“ Bjórinn er rótsterkur, með 10 prósenta áfengismagni en þó ekkert sérstaklega þungur þrátt fyrir háa alkóhólprósentu heldur ljós, léttur og fruity, að sögn bruggmeistarans.

Sturlaugur þróaði bjórinn ásamt félaga sínum í faginu, Valgeiri Valgeirssyni. „Við erum uppfullir af hugmyndum og reynum að koma með eins mikið af nýjum bjórum og við getum. Það er gaman að tengja bjórana við árstíðir, ákveðin tímamót eða fögnuði.“

Hann segir bjórinn aðeins framleiddan í takmörkuðu magni en þó sé aldrei að vita nema hann komi aftur að ári.

Verkefnastjóri brugghússins, Óli Rúnar Jónsson, segir bjórinn mikið gæðaöl. „Þetta er fyrsti íslenski Gay pride bjórinn,“ fullyrðir Óli en hann segist ekki vita hvort slíkur hafi verið framleiddur úti í heimi.

Hann segir Fíton eiga meira og minna heiðurinn af útfærslunni á miðanum á flöskunni. Miðinn er einstaklega litríkur, enda með fána samkynhneigðra, og snýr á hvolf.

„Öfugur bjór til heiðurs öfugu fólki,“ segir Sturlaugur og hlær. „Það er til þess að undirstrika, og náttúrulega fánalitir samkynhneigðra, þá teningu. Það þarf að hafa húmor í þessu.“