Ása hættir sem forseti Leiklistarsambandsins - sátt við Grímuna

Forseti Leiklistarsambands Íslands, Ása Richardsdóttir, ætlar að láta af embætti næsta haust og mun ekki bjóða sig fram til endurkjörs. Ása hefur verið í forystu sambandsins frá árinu 2009.

Í samtali við fréttastofu segir Ása að það heimti mikla vinnu að sinna embættinu, „en þetta er mikilvægt starf því Leiklistarsambandið er sameiginlegur vettvangur allra í sviðslistum og helsti viðmælandi stjórnvalda á hverjum tíma,“ bætir hún við. Síðasta stóra framkvæmd Ásu í embætti forseta sambandsins voru sviðslistarverðlaunin Gríman sem var haldin í Þjóðleikhúsinu í gærkvöldi, í beinni útsendingu á RÚV.

„Ég er ánægð. Ég held að okkur hafi tekist að búa til hátíðlega og skemmtilega athöfn, jafnt fyrir sjónvarpsáhorfendur, sem og okkur sem í salnum voru,“ svarar Ása spurð hvernig henni hafi fundist til takast á hátíðinni. „RÚV er aðili að leiklistarsambandinu og við erum glöð yfir því að athöfnin var nú sýnd beint í sjónvarpi allra landsmanna eftir nokkurt hlé.“

Ása bætir við að það hafi verið skemmtilegt að sjá gömul myndbrot úr leikhúsi, úr safni sjónvarpsins, sem Egill Eðvarðsson dagskrágerðarmaður setti listilega saman.

Ása segir hápunkt kvöldsins hafa verið afhending heiðursverðlauna sambandsins. „Ég var ákaflega stolt af því að fá að veita Gunnari Eyjólfssyni verðlaunin fyrir hans mikla ævistarf í þágu leiklistar,“ segir Ása og bætir við að margt hafi vissulega staðið upp úr eftir kvöldið, meðal annars nefnir hún sérstaklega flutning Gunnars Eyjólfssonar, sem „sýndi“ þeim Ingvari E. Sigurðssyni, Birni Hlyni Haraldssyni og Arnari Jónssyni, í tvo heimana þegar hann fór með texta úr leikritinu Pétri Gaut, en allir hafa þeir leikið aðalhlutverkið.

„Það hefur verið gefandi að veita leiklistarsambandinu forystu og ég mun áfram vinna að spennandi verkefnum í sviðslistum, bæði hér heima og erlendis, “ segir Ása að lokum.