Samdi sexý mix fyrir eina af stærstu netverslunum heims

Það kannast margir við Loga Pedro Stefánsson úr hljómsveitinni Retro Stefson, en hann semur einnig tónlist og vinnur sem plötusnúður undir nafninu Pedro Pilatus. Umsjónarmenn einnar af stærstu hátísku netverslunum heims, Ssense.com, heilluðust af tónlist Loga, höfðu samband við hann og fengu til að semja mix sem er nú spilað í búðinni. Ssense.com selur klæðnað frá háklassa hönnuðum á borð Givenchy, Balmain, Lanvin Alexander Wang og Rick Owens. Lífið forvitnaðist um málið.

Hvernig kom til að Ssense.com höfðu samband og báðu þig um að taka þátt í þessu?

Ssense hafa verið með svona mixseríur þar sem þau fá raftónlistarmenn til að taka upp mix sem þeir spila svo í búðunum. Mér finnst rosalega mikill heiður að hafa verið beðinn um að taka þátt í þessu þar sem það hafa verið mjög stór nöfn að mixa á undan mér, t.d. LV, How To Dress Well og Teen Daze. Þau höfðu samband við umboðsmanninn minn og spurðu hvort ég gæti verið til í þetta. Sögðust hafa verið að fygjast með mixunum mínum á SoundCloud, fundist þau eitthvað sexý og vildu fá mig til að mixa fyrir sig.

Hvernig hafa viðbrögðin verið?

Mjög góð. Ég setti til dæmis eitt lag af plötunni hennar Azealia Banks í mixið og gaurinn sem samdi lagið kommentaði undir það á Seense. Hann hafði þá tekið upp sambærilegt mix fyrir búðina nokkrum mánuðum fyrr. Þannig ég er rosa sáttur með viðbrögðin enn sem komið er.

Er eitthvað spennandi á döfinni hjá Pedro Pilatus eða Retro Stefson?

Já algjörlega. Ég gaf út fyrstu smáskífuna mina í nóvember síðastliðnum og hún lenti strax í topp 20 yfir bassamúsík á stærstu danstónlistarsíðu Breta, Juno Records. Svo er vonandi stutt í næstu smáskífu en ég hef verið í viðræðum við nokkur útgáfufyrirtæki. Ég er að fara að spila á Sónar næstu helgi og það verður í fyrsta skipti sem ég mun spila live síðan á Airwaves 2009. Retro Stefson er að túra frá lok mars fram í byrjun maí um alla Evrópu og ég stefni á að taka nokkur Pedro Pilatus dj sett eftir tónleikana á þeim túr. Það er nóg að gera.

Mixið sem Logi gerði fyrir Ssense má finna hér.

Pedro Pilatus á Facebook.