Segir útspil Já vera klúður

Sérfræðingur í almannatengslum segir útspil Já vera klúður að óþörfu, en fyrirtækið hefur látið hanna límmiða til að líma yfir forsíðu símaskrár síðasta árs en á henni er mynd af Agli Einarssyni, öðru nafni Gillz, og fimleikastúlkum úr Gerplu.

Fyrirtækið Já fékk Gillz til að hanna og prýða kápu símaskrár ársins 2011 og vakti það hörð viðbrögð hjá mörgum en hundruðir hótuðu að skrá sig úr símaskránni ef þetta yrði að veruleika. Ástæða mótmælanna var meint kvenfyrirlitning Gillz. Já stóð á sínu og Gillz prýddi forsíðuna ásamt fimleikastúlkum úr Gerplu. Egill Einarsson, maðurinn á bakvið Gillz, hefur verið kærður í tvígang fyrir kynferðisbrot á síðustu mánuðum en en ekki liggur enn fyrir hvort Egill muni verða ákærður. Já lét fyrir áramót útbúa límmiða til að koma til móts við þá viðskiptavini sína sem kjósa að sjá ekki Gillz þegar þeir taka símaskrána fram. Sigríður Margrét Oddsdóttir, forstjóri Já, vildi ekki koma í viðtal en segir fyrirtækið ekki með neinum hætti vera að taka efnislega afstöðu til málsins, sem enn er í rannsókn. Hún segir nokkra tugi viðskiptavina fyrirtækisins hafa nýtt sér þennan valkost.

Jón Hákon Magnússon, sérfræðingur í almannatengslum, hefur meðal annars sérhæft sig í krísustjórnun fyrirtækja. Honum finnst aðgerðir Já mjög grófar. Hann segir að málið hljóti að skaða ímynd Já mjög mikið, allavega til skamms tíma. Fyrirtækið sé með aðgerðunum ekki að ná að klóra yfir þau meintu mistök að hafa Gillz á forsíðunni