Gunnar segir bara pass

„Bara pass," sagði Gunnar Birgisson, bæjarfulltrúi Sjálfstæðisflokksins í Kópavogi, þegar hann var spurður út í gang meirihlutaviðræðna í Kópavogi. Oddvitar Framsóknarflokksins, Sjálfstæðisflokksins og Lista Kópavogsbúa hafa staðfest að meirihlutaviðræður væru í gangi.

Gunnar segir að hann hafi enga aðkomu að meirihlutaviðræðunum en honum lítist vel á það sem fram fer núna. „Ég þekki þetta fólk og mér líst vel á það," segir Gunnar. Hann vill ekkert segja um það hvaða meirihlutamynstur hann vildi helst sjá í bænum. „Ég tjái mig ekkert um það en mér líst bara vel á þetta," segir Gunnar.

Gunnar segist vonast til þess að hægt verði að sjá myndun nýs meirihluta fyrir lok helgarinnar.