Gera ráð fyrir allt að 1000 manns á sundmót samkynhneigðra

Undirbúningur heimsmeistaramóts samkynhneigðra í sundi gengur vel, en mótið mun fara fram í Reykjavík síðustu helgina í maí. Í dag fékk Íþróttafélagið Styrmir, sem sér um undirbúning mótsins, þriggja milljóna króna styrk frá borgarráði vegna mótsins. Auk þess leggur borgin til aðstöðu því mótið fer fram í Laugardalslauginni og Sundhöllinni.

Jón Þór Þorleifsson, hjá sunddeild Styrmis, segir að von sé á 800-1000 manns til landsins vegna mótsins, hvaðanæva að úr heiminum. Hann segir að vel gangi að undirbúa mótið. „Við erum búin að vera tvö ár að undirbúa þetta," segir Jón Þór. Hann segir að keppt verði í sundi, dýfingum dýfingum og synchro.

Mótið mun standa yfir í fjóra daga, en það hefst á miðvikudegi og stendur fram á laugardag.

Þeir sem hafa áhuga á að kynna sér meira um mótið geta smellt hér.