Sækist eftir 2 til 3 sæti í Suðvesturkjördæmi

Magnús Orri Schram, þingmaður, sækist eftir 2 til 3 sæti í prófkjöri Samfylkingarinnar í Suðvesturkjördæmi sem fram fer þann 10. nóvember.

„Ég vonast eftir því að fá stuðning í eitt af efstu sætum á lista Samfylkingarinnar í Suðvesturkjördæmi," segir Magnús Orri.

„Ég tel mikilvægt að á næsta kjörtímabili verði gætt að samkeppnishæfni atvinnulífsins, bæði með bættum ytri skilyrðum þar sem aðild að ESB gegnir lykilhlutverki, og ekki síður í gegnum hvetjandi skattkerfi sem laðar fram nýsköpun og framþróun.“

„Verkefni stjórnmálamanna er að skapa aðstæður fyrir nútíma atvinnulífi sem byggir á þekkingu, og býr til störf og verðmæti í sátt við náttúruna," segir Magnús Orri.

Magnús Orri var kjörinn á þing fyrir Samfylkinguna árið 2009 og hefur gegnt varaformennsku í viðskiptanefnd og atvinnuveganefnd þingsins.

Hann hefur verið formaður þingflokks Samfylkingarinnar frá síðustu áramótum. Hann stígur til hliðar í dag og lýsir jafnframt yfir stuðningi við Oddnýju G. Harðardóttur til að taka við formennsku í þingflokknum.