Frelsi fjölmiðla minnkar á Íslandi

Frelsi fjölmiðla á Íslandi minnkaði nokkuð í fyrra miðað við árið á undan. Þetta kemur fram á listanum World Press Freedom Index sem gefinn er út árlega yfir frelsi fjölmiðla í tæplega 180 löndum um allan heiminn.

Listinn er settur saman á hverju ári af rúmlega 130 blaða- og fréttamönnum. Árið 2010 var Ísland í öðru sæti listans á eftir Finnlandi sem skipaði efsta sætið. Ísland er dottið niður í sjötta sæti listans sem landið deilir með Lúxemborg. Ekki er að finna skýringu á þessu falli Íslands en hugsanlega gætir þar áhrifa frá umdeildum dómsmálum gegn hérlendum blaðamönnum á síðasta ári.

Á árunum fyrir hrun eða 2007 og 2008 skipaði Ísland efsta sætið á þessum lista, þ.e. frelsi fjölmiðla var talið mest hér á landi.

Finnland heldur stöðu sinni en deilir efsta sætinu með Noregi að þessu sinni. Á undan Íslandi eru auk þess Eistland, Austurríki og Holland.

Í neðstu sætum listans eru lönd á borð við Norður-Kóreu, Sýrland og Íran.

Athylgi vekur að bæði Bandaríkin og Bretland hrapa niður þennan lista. Bandaríkin falla úr 20. sæti og niður í 47. sæti. Bretland fellur úr 19. sæti og niður í 28. sæti. Þar kemur m.a. til harkalegar aðgerðir gegn Occypy hreyfingunni í Bandaríkjunum og símahleranir í Bretlandi.