Enn lokað á heiðinni

Hellisheiðin og Þrengslin eru enn lokuð og ekki útlit fyrir að veður taki að lagast þar að ráði fyrr en vindur gengur niður undir kvöld, samkvæmt upplýsingum frá Vegagerðinni.

Þar á bæ vonast menn þó til þess að hægt verði að opna veginn um Þrengsli bráðlega þótt þeir treysti sér ekki til að nefna tímasetningu í þeim efnum. Nú er tekið að hlána á láglendi um suðvestan- og vestanvert landið og um leið og blotnar verða vegir flughálir. Veðurfræðingur Vegagerðarinnar segir ennfremur að á fjallvegum vestanlands og á Vestfjörðum fari veður versnandi með hríð og lélegu skyggni.

Meðal annars er skafrenningur, ofanhríð og mjög lélegt skyggni á Bröttubrekku og Holtavörðuheiði nú eftir hádegið.