Rammaáætlun felur ekki í sér endanlega úthlutun

Svandís Svavarsdóttir umhverfisráðherra segir ekki rétt að halda því fram að í rammaáætlun um vernd og nýtingu náttúrusvæða felist endanleg úthlutun þeirra náttúrusvæða sem þar eru undir. Vinna við áætlunina er á lokaspretti og hún segir hana vera forgangsverkefni hjá sér og Oddnýju G. Harðardóttur, starfandi iðnaðarráðherra.

„Ég hef velt upp þeirri spurningu í hvaða stöðu núlifandi kynslóð er að setja sig gagnvart framtíðinni með því að taka þessar ákvarðanir í eitt skipti fyrir öll, en fyrst og fremst er þetta mjög mikilvægt ferli sem ég er alveg handviss um að er náttúruvernd til framdráttar.“

Hugmyndin að baki rammaáætluninni var að skrá þau náttúrusvæði sem mætti nýta, svo sem til virkjana, og þau sem ætti að vernda. Einhver lenda svo í biðflokki og ákvörðun varðandi þau bíður þá betri tíma.

Svandís segir þessa afstöðu sína ekki ganga gegn grunnhugsun áætlunarinnar. „Nei, en ég tel rétt að halda þeirri spurningu vakandi hvaða vald við erum að taka okkur.“

Samkvæmt þingmálaskrá á að leggja rammaáætlun fram í byrjun febrúar. Ljóst er að málið gæti orðið ríkisstjórninni erfitt, enda umdeilt hvar á að virkja og hvar vernda.

Málið er nú á borði umhverfisráðherra og iðnaðarráðherra. Þegar þeir hafa náð saman um það verður það kynnt í ríkisstjórn og þaðan fer það fyrir stjórnarflokkana áður en það er lagt fyrir Alþingi.

Samkvæmt heimildum Fréttablaðsins er nú unnið að því að ná sátt um að tillagan breytist ekki í meðförum þingsins; komi þaðan út eins og hún fór þangað inn. Telja menn að ef opnað verði fyrir umræðu um einstaka kosti þýði það umræðu um hvert og eitt einasta landsvæði. Því þurfi að ná sátt um umdeild svæði eins og neðri hluta Þjórsár áður en málið kemur á Alþingi.

Kostnaður við 2. áfanga áætlunarinnar er um hálfur milljarður. Við það bætist undirbúningskostnaður á árunum 2005 til 2006 og einhver kostnaður við 1. áfanga áætlunarinnar.

kolbeinn@frettabladid.is