Tók sjö mánuði að óska svars vegna sakamáls Jóns Baldvins

Það tók utanríkisráðuneytið sjö mánuði að óska eftir upplýsingum vegna rannsóknar á meintum lögbrotum Jóns Baldvins Hannibalssonar, sem var þar æðsti yfirmaður til fjölda ára.

Eins og fram kemur í Nýju lífi kærði Guðrún Harðardóttir, systurdóttir eiginkonu Jóns Baldvins, hann fyrir kynferðisbrot árið 2005.

Þau bréf sem voru enn til rannsóknar við endurupptöku málsins voru skrifuð af Jóni Baldvin í Washington D.C. í Bandaríkjunum þar sem hann var sendiherra, og send til Guðrúnar í Venesúela, þar sem hún var skiptinemi.

Á Íslandi eru lög um brot gegn blygðunarsemi en við lögreglurannsókn málsins þurfti að afla upplýsinga um hvort sambærileg lög væru til staðar, annars vegar í Bandaríkjunum og hins vegar í Venesúela. Lögreglan óskaði eftir upplýsingum frá dómsmálaráðuneytinu, sem vísaði erindinu til utanríkisráðuneytisins í mars 2006.

Utanríkisráðuneytið var í tæpt ár að afla þessara upplýsinga.

Spurningin sem utanríkisráðuneytið þurfi að svara var þessi: Er sambærilegt lagaákvæði í gildi, annars vegar í Bandaríkjunum og hins vegar í Venesúela? Það er allt og sumt.

Fréttastofa óskaði gær eftir svörum frá ráðuneytinu um ástæður þessara tafa.

Í svari ráðuneytis kemur fram að sjö mánuðum eftir að erindið barst ráðuneytinu var sent fyrirspurn til Washington vegna þessa. Ekkert svar barst. Því varfyrirspurnin send til sendiráðs Bandaríkjanna í Reykjavík sem svaraði þremur mánuðum eftir að erindið var fyrst sent til Washington.

Þá tók það ráðuneytið alls ellefu mánuði að afla fullnægjandi svara um löggjöf í Venesúel en ekki kom fram í svari hvenær erindið var fyrst sent. Ráðuneytið sendi svar sitt fimm dögum eftir að dómsmálaráðuneytið hafði sent þangað ítrekun vegna málsins.

Í skriflegu svari utanríkisráðuneytis til fréttastofu er tekið fram að að hvergi í gögnum málsins komi fram „að það tengist fyrrverandi starfsmanni þess", en Jón Baldvin var þar bæði ráðherra og síðar sendiherra.

Ráðuneytið hefur ekki svarað hvort um óeðlilega töf var að ræða.